Biblioteka

Eit bibliotek er ikkje ei boksamling eller ein digital lagerplass. Det er eit reflekterande rom.

NASJONALBIBLIOTEKAREN, Vigdis Moe Skarstein, var i Dagens Næringsliv lørdag lei seg over at Google «har stjålet bibliotekets forretningside». Børsvinnar Google har vore raske og sett i gang med å digitalisera boksamlingane frå verdas fremste universitet, mens bibliotekvesenet har sove i timen. Google sitt mål er å fullenda draumen frå Alexandria og Babel om å samla alle bøker og all kunnskap i sitt digitale rom. Og vera herre over den.

VIGDIS MOE SKARSTEIN er glad i ordet «kunnskapsallmenning», og den gleda deler eg med henne: Bøker og informasjon som felles goder som er tilgjengelige for alle utan omsyn til markedsverdi og betalingsevne. Men kor levedyktig er gratisprinsippet når Google får i gang taxameteret? Og når dei som produserer kunnskapen og dei litterære skattane skal ha sin rettferdige skjerv? Det kan bli ein trongt allmenning i skvisen mellom digitale monopolistar, kommunale innsparingar og privat betalingsvilje.

BIBLIOTEKA er fattige institusjonar, men dei er fulle av menneske som er glade i bøker og tekstar, veit kvar dei er å finna, og som kan hjelpa deg med råd og dåd. Men å markedsføra og framheva seg sjøl, er ikkje deira sterke side. Dei styggest nærmast ved det, og dei ser iscenesetting som ein motsats til substans. Derfor står dei i fare for å bli plassert som høgtidelige forvaltarar av støvete boksamlinger som kan stuvast bort som ein fortidslevning i informasjonssamfunnet.

Artikkelen fortsetter under annonsen

ECON HAR TEIKNA tre scenariar om bibliotekas framtid for ABM-utvikling: Åndenes bokhus, Library Fair og Uten en tråd. Det første er eit reint elitebibliotek for spesialistar, og det andre ein rein markedsplass for kjøp og sal og leige. Det tredje er ikkje eit hus eller ein stad, men ein digital portal der det offentlige kanskje kan betala bompengane, men der det ikkje finnest noen til å hjelpa oss i trafikken. Me får klara oss som best me kan. Bli vår eigen bibliotekar i eit virtuelt bibliotek - akkurat som me er blitt vår eigen bankfunksjonær på nettet.

ROBERT PUTNAM, amerikansk samfunnsforskar, har skrive boka med den dystopiske tittelen «Bowling alone». Tesen hans er at folk blir meir private og deltar mindre i samlande aktivitetar på felles arenaer. Dei sosiale fellesskapa tynnest ut, det sivile samfunnet forvitrar og den sosiale kapitalen blir borte. Resultatet blir isolasjon og disintegrasjon.Då Putnam var i Oslo nylig og snakka til ei forsamling av bibliotekarar, fridde han til dei som framtidas redningsmenn - i ein kombirolle av fagarbeidar, kulturarbeidar og sosialarbeidar.Han såg for seg framtidas bibliotek - ikkje som varehus for informasjon, men som fysiske møtestader for folk og idear. Der det er meir bruk for møterom enn magasin, og der bibliotekarane seier «snakk høgare» i staden for «hyssssj».

DET ER VEL å venta for mye av biblioteka, at dei skal vera det åpne samtaleromet og ein siste skanse for fellesskap i eit støyande og fragmentert samfunn. Men me treng noen med innleving og innsikt til å hjelpa oss frå å tapa oversikten i den usorterte informasjonsjungelen. Elles blir ikkje kommunikasjonssamfunnet noe kunnskapssamfunn. Derfor er det langt frå sikkert at det viktigaste for framtidas bibliotekarar er å vera informasjonsteknologiske spydspissar. For eit bibliotek er noe anna enn ei boksamling eller ein digital lagerplass. Det er viktigare som eit refleksivt rom enn som maskinrom.