VIKTIG 

ROLLE: Vi ønskjer å ta vare på lensmannsetaten slik vi kjenner denne, og då er faktisk lensmannen ei viktig rolle å ta med vidare, skriver Jenny Klinge.

Foto: Heiko Junge / NTB scanpix
VIKTIG ROLLE: Vi ønskjer å ta vare på lensmannsetaten slik vi kjenner denne, og då er faktisk lensmannen ei viktig rolle å ta med vidare, skriver Jenny Klinge. Foto: Heiko Junge / NTB scanpixVis mer

Politireformen:

Er lensmenn eit problem?

Dei lensmannskontora som faktisk står igjen etter politireforma må styrkast. I staden legg regjeringa opp til at dei svekkast.

Meninger

Det er påfallande korleis justisminister Listhaug får drahjelp frå leiaren av Politilederne og fleire politimeistrar no rett før Senterpartiets forslag om å styrke det lokale politiet skal avgjerast i Stortinget.

Meldinga frå desse er at Stortinget for all del ikkje må vedta at kvart lensmannskontor skal ha ein lensmann. Listhaug går lengst. Ho viser til at lensmenn på kvart lensmannskontor vil skape problem i kampen mot pedofili.

Vi i Senterpartiet legg fram fleire forslag, med ein fellesnemnar: Dei lensmannskontora som står igjen etter reforma skal styrkast, og ikkje svekkast slik regjeringa legg opp til mange stader.

Det er nødvendig at stortingsfleirtalet slår dette fast. Henning Engen, nestleiar i NTL Politiet i Troms, skreiv nyleg i eit innlegg i Dagbladet at «Publikum i distriktet vil måtte kjøre langt og lengre enn langt for å komme til et lensmannskontor med innhold. Noen vil ha en kjøretur på 5 timer for å finne et lensmannskontor hvor man får utført sivile oppgaver.»

Eg deler bekymringa til Engen. Det er uhaldbart at vi i 2018 legg opp til særs store avstandar mellom politiet og befolkninga mange stader, i alt frå å skaffe seg pass til å treffe ein politibetjent for ein nødvendig prat.

Den såkalla nærpolitireforma har ført til at over 120 lensmannskontor blir nedlagte. På mange av dei gjenverande kontora blir både lensmannen og andre stillingar fjerna. Dette er ikkje greitt, og det er vesentleg at Stortinget slår fast at regjeringa ikkje få la dette halde fram.

Når vi ønskjer at kvart lensmannskontor skal få behalde lensmannen sin, er det ikkje fordi vedkomande berre skal vera sjef og vera ein utgiftspost, slik Listhaug framstiller det som. Lensmannen skal i høgste grad vera ein del av arbeidslaget, og ha naudsynte fullmakter til å fatte avgjerder lokalt.

Vi ønskjer å ta vare på lensmannsetaten slik vi kjenner denne, og då er faktisk lensmannen ei viktig rolle å ta med vidare.

Ein treng ikkje tilsetje ekstra folk for å sikre lensmenn alle stader, men dersom ein tek argumentasjonen frå regjeringspartia frå alvor, skulle det vera rom for fleire stillingar på kvart av dei gjenverande lensmannskontora. Den massive nedlegginga av kontor skulle jo nettopp føre til meir nærpoliti på dei kontora som vart att og fleire patruljar på vegane.

No klarer ikkje justisministeren å bevise at det har vorte meir politi på hjul. Mange lensmannskontor opplever kutt i staden for styrking. Og lensmannen forsvinn i dragsuget.

Lik Dagbladet Meninger på Facebook