SENSUR: Korleis skal palestinarane nå fram med si stemme dersom dette vert sensurert av Facebook? spør artikkelforfatteren. Foto: Jonathan Nackstrand / AFP / NTB Scanpix.
SENSUR: Korleis skal palestinarane nå fram med si stemme dersom dette vert sensurert av Facebook? spør artikkelforfatteren. Foto: Jonathan Nackstrand / AFP / NTB Scanpix.Vis mer

Debatt: Facebook

Facebook skal ikkje kunne diktere kva som når nyhendebilete

Ved å inngå ein avtale med Israel, bidrar Facebook til at å strupe den palestinske stemma i konflikten.

Meninger

I Jan-Erik Smilden sin kommentar «Israel og Facebook skal samarbeide» kjem det fram at Facebook og Israel har inngått eit samarbeid som skal løyse eit «problem» Israel har; nemleg at det til stadigheit vert lagt ut oppdateringar frå palestinske facebookbrukarar som «oppfordrer til vold». Kan vi la denne avtalen passere i stillheit, slik at Facebook får diktere kva argument i Israel-Palestinakonflikta som når dagens lys?

Synne M. Berge. Foto: Privat.
Synne M. Berge. Foto: Privat. Vis mer

Eg har sjølv ein palestinsk facebookven, som legg ut innlegg frå kvardagen i Hebron. Berre den siste veka har han lagt ut seks innlegg om palestinarar som er blitt skotne av det israelske militæret. Det er rystande å sjå slike innlegg på sosiale media som elles er fylt med videoar av dyr og bustadannonsar. Det er ikkje kvardagsmat å sjå bilete av ungdom som er blitt skotne, og det er nettopp difor slike innlegg har ein effekt. Vi skal bli sinte, fortvila og oppgitt av slikt. Innlegga vert ikkje berre sett av andre palestinarar og israelarar. Dei vert også sett av resten av verdssamfunnet. Nettopp på grunn av dette er det veldig viktig at dei ikkje vert sensurert av Facebook.

Facebook er meint for å dele livshendingar med vener og kjende, og det er akkurat det dei palestinske brukarane gjer når dei legger ut innlegg om sin daglege kamp i den pågåande konflikten. At Facebook no har inngått ein avtale med Israel med det formål å slette innlegg som er uheldige for Israel (det er i realiteten det som vil skje), så bidrar Facebook i aller høgste grad til at å strupe den palestinske stemma i konflikten. Og korleis skal palestinarane nå fram med si stemme dersom dette vert sensurert av Facebook?

Facebooksensur er dagsaktuelt. Blant anna har ytringsfridomsekspert Anine Kierulf fått sin tekst sensurert, redaktør i Aftenposten Espen Egil Hansen har hatt eit ope oppgjer med Facebook og statsminister Erna Solberg har fått sletta sin facebookpost med «napalmjenta». Etter eit ramaskrik frå brukarar av Facebook verda over vart til slutt bilete av «napalmjenta» godteke. Eit liknande ramaskrik bør vi sjå i samband med Israel-Facebookavtala som no er inngått. Facebook skal ikkje kunne diktere kva som når nyhendebilete, eller kva side av ei konflikt som skal få sleppe til på Facebook.

Dersom vi let Facebook gje etter for presset frå Israel, og dermed diktere denne konflikten gjennom sensur, korleis kan vi då sette ned foten i neste konflikt Facebook vil sensurere?

Lik Dagbladet Meninger på Facebook