Oslo 20150410 Kari Jaquesson hevder at NRKs Trygdekontoret sin porno er brudd på sexkjøpeloven . Foto: Halvor Solhjem Njerve / Dagbladet
Oslo 20150410 Kari Jaquesson hevder at NRKs Trygdekontoret sin porno er brudd på sexkjøpeloven . Foto: Halvor Solhjem Njerve / DagbladetVis mer

Forsking viser at kommentator-Noreg har gått og venta på eit eller anna å ta Kari Jaquesson på

Alle på dama!

Meninger

Sugetipikkaromdagen-gate har brusa i media eit par dager no, her er ei forsøksvis oppsummering.

Det var parolemøte 11. februar 2016, der alle kunne møte opp og diskutere kva paroler som skulle viftast med under 8. mars-toget i Oslo. Møtestaden var Norsk Sykepleierforbund sine lokale, ironisk nok plasserte i Tollbugata, der ein alltid kan finne prostituerte frå minst to kontinent.

Ein politikar frå Unge Venstre, Maria Katinka Lie, sa følgande: «Jeg er feminist, og jeg er for legalisering av sexkjøp. (...) Jeg synes det er på høy tid at vi tar ansvar og ser på alternative løsninger på det store problemet det er med vold mot prostituerte. Som for eksempel bordeller, i stedet for å jatte (her byrjar publikum å le og fnise, muligens også Lie sjølv) med den samme sexkjøpsloven som mange hevder har spilt fallitt.»

Det burde ikkje kome som eit sjokk at Unge Venstre er for bordell. Både Frp, Høyre og Venstre har meint at sexkjøplova ikkje fungerer, og det lenge før Vista Analyse kom med si evaluering, bestilt av regjeringa.

Sveinung Rotevatn, stortingsrepresentant for Venstre, sa det slik: «Med mindre kommende evaluering er overraskende positiv, bør loven fjernes.»

Men som ofte er tilfellet når ein politikar ventar på ei analyse: Det var ikkje så nøye kva analysen sa. Vista Analyse sin konklusjon var - nettopp - overraskande positiv.

«Evalueringen viser at prostitusjonsomfanget i Norge er redusert med 20-25 prosent sammenlignet med året før loven trådte i kraft.»

Påstanden til Maria Katinka Lie er altså meir prega av kva Venstre har bestemt seg for enn kva forskinga seier.

Men det alle har hengt seg opp i, er Kari Jaquesson sitt lausrivne sitat, frå hennar motinnlegg. « ... og så synes jeg du skal prøve å suge pikk ti ganger i døgnet.»

Frå publikum, eller frå Maria Katinka Lie, kan ein høyre eit høgt gisp. Så seier Lie: «Unnskyld meg!»
Jaquesson durar på: «Det er sexkjøp. Sex ... kjøp handler ikke om en festlig, abstrakt idé. Det er ingenting abstrakt med hverdagen til de som må selge sex. Som må stille sine kroppsåpninger til rådighet for de som kan betale.»

Og så hadde vi det vanlege mediabråket igjen, då.

Det er fint med litt opprusking i den indre korreksen i feministmiljøa. Det er bra at jenter tillater seg sjølv å kalle seg feminist sjølv om dei ikkje deler kvinnegruppa Ottar sitt intense raseri, og det er bra at feminisme og intenst raseri ikkje treng å vere knytta ugjenkalleleg ihop.

Men.

Det Jaquesson prøvde å få fram her, er at sexkjøpslova ikkje er ein fallitt. Den er ei eksportvare. Den er ein enorm suksess. Det einaste argumentet bordell-fansen har, den auka risikoen for vold, blir også imøtegått i evalueringa:

«Volden har ikke økt. Sexkjøpsloven styrker selgeren ved at kjøp kan anmeldes. Dette har gitt selgeren et virkemiddel for å håndtere dårlige kunder, kundene blir mer forsiktige, og kan for enkelte hindre utøvelse av vold.

Denne grunnleggende realiteten må veies mot at kvinner i gatemarkedet opplever at de har fått svekket sin forhandlingsposisjon og rapporterer om en større utrygghet i markedet. På innemarkedet oppleves det som en større risiko for de prostituerte å betjene sine kunder utenfor egen leilighet og/eller hotellrom. Terskelen for å anmelde en voldelig kunde kan ha blitt høyere av redsel for å «blåse» leiligheten eller stedet der sexhandelen foregår.

Det er likevel ikke grunnlag for å si at prostituerte i gatemarkedet reelt sett er mer voldsutsatt som følge av sexkjøpsloven. Det er kunden som gjør noe ulovlig og har størst grunn til å frykte konsekvensene av rapportert vold.

Politiet har ingen indikasjoner på økt vold som følge av sexkjøpsloven. Andre undersøkelser av vold i prostitusjonsmiljøene finner heller ikke støtte for en antagelse om økt vold mot prostituerte etter innføring av sexkjøpsloven.» (mine uthevingar)

Evalueringa slår altså fast at frykta ikkje har reelt grunnlag. Men det er så klart kortsiktig ugunstig at businessen deira har krympa 20-25 prosent. For den normgivande effekten er reell: Færre kjøper sex. Det betyr mindre pengar - men på lang sikt: Færre som går inn i prostitusjon.

20-25 prosent av sexhandelen er MYKJE pengar. All forsking eg har sett, seier at ein må redusere etterspurnaden etter sexkjøp om ein skal redusere trafficking. Den skandinaviske sexkjøpslova er så langt den beste modellen for dette. Høyre har, trass i at dei framleis er imot den på programmet, freda sexkjøpslova ut si regjeringsperiode. Det viser at dei har ei ryddig instilling, og at resultata av lova er så kraftige at dei ikkje kan ignorerast.

At representantar for Unge Venstre så ignorerer Vista Analyse si evaluering fordi den ikkje passar med det dei har bestemt seg for, er den eigentlege skandalen.

Lik Dagbladet Meninger på Facebook