DENNE VEKA LEGG

den afghanske overgangsregjeringa - med Verdsbanken og tunge FN-institusjonar i ryggen - fram eit tilbod til gjevarlanda som møtest i Berlin: betal for vår fred og utvikling, elles vert Afghanistan eit reir for internasjonal terrorisme og narkotikaproduksjon. Prislappen er på nær 30 milliardar dollar over 7 år.

Første utkast av dokumentet som set dagsorden for møtet - kalla «Securing Afghanistan's Future» - likna meir utpressing enn utviklingsplanlegging. Etter at Verdsbanken, FN sitt utviklingsprogram (UNDP), og FN-kontoret som leiar Afghanistan innsatsen har arbeida med det i nokre månader, framstår det no som ein fyldig og veldokumentert plan. Ei rekke framtidsmål er trekt opp - kva Afghanistan treng av vegar, skular, vassforsyning og infrastruktur - måla er knytt til FN sine Tusenårsmål, og så påsatt ein prislapp. Det internasjonale samfunnet er bedt om å finansiera 85 prosent av rekninga.

Men, eit trugande framtidsscenario vert trekt opp dersom verdsamfunnet ikkje reisar pengane. Då vil Afghanistan som stat bryta saman eller verta ein røvarstat, narkotika - økonomien tek over, det vil igjen finansiera internasjonale terroristar, og verda vil få svi. Argumentet at stilt overfor eit slikt skrekkbilete er det meir lønsamt å investere i fred og utvikling i Afghanistan. Her vises det og til kostnader på andre område, som militære operasjonar, fredsbevarande styrkar og handtering av flyktningar, då desse langt overskrir den summen det no kjem krav om for å fremja fred og utvikling.