Donald Trump har gjort oss alle til tolkarar av korte tekstar i eit forsøk på å forstå kva som hender i USA. Kvifor ikkje vie tid til nokon som meistrar formatet og faktisk har noko å melde? Danez Smith og Ocean Vuong er to av dei unge poetane som blir presentert i den ferske antologien «Ny amerikansk poesi» og som skriv seg rett inn i den komplekse tida vi lever i.

I starten av juni kunne dei av oss som var på rett stad til rett tid få med seg den amerikanske stjernepoeten Danez Smith på scenen i Trondheim og Oslo.

Smith var i Noreg i samband med lanseringa av ein ny antologi med gjendiktingar av amerikansk poesi som er ute på Samlaget i desse dagar. Antologien er den første i sitt slag sidan 1970, og presenterer åtte poetar som til saman utgjer eit lite tverrsnitt av dei nye stemmane som har gjort seg mest gjeldande i den amerikanske poesien dei siste fem-seks åra. Dei representerer eit vidt spenn, både i uttrykk og tematikk. Felles likevel at alle har vakse opp i USA i tida etter 11. september 2001. I poesien sin speglar dei eit samfunn som har krakelert, der ulikskapane aukar og splittinga i befolkninga blir djupare, men kor det også finst ein utbreidd og sterk vilje til protest.