At unge nordmenn trur tacokjøttdeigen kjem frå butikken og ikkje frå, eh, kua? er gammalt nytt. Det interessante framover blir å sjå kor ungdommen trur at besteforeldre blir av, når sistnemnde på eitt tidspunkt sluttar å dukke opp i bursdagane. Veit unge folk fortsatt at menneske har ein tendens til å visne og døy?

Grunnen til at eg spør, er at færre og færre etnisk norske (eller kva ein skal kalle dei) er å finne i arbeid på landets sjukeheimar. I siste utgåve av Nytt Norsk Tidsskrift skriv forskar ved Senter for samfunnsforsking Julia Orupabo om den aukande etniske lagdelinga i omsorgssektoren: Minoritetar får lettare innpass der etterspurnaden er høg og statusen låg - altså ved sjukeheimane. Dette fører til at etnisk norske søker seg «opp» eit hakk, til sjukehusa, fordi andelen minoritetar i eldresektoren blir for høg, med det det fører med seg av for eksempel språkproblem. Resultatet: nordmenn flest slepp å bry seg med sjuke og døyande gamlingar.