Johs. Aanderaa forma norsk kulturpolitikk på 70-talet. Frå sin posisjon som ekspedisjonssjef i Kyrkjedepartementet var han den eigentlige kulturministeren, for dette var før departementet blei delt for å gje plass for katolikken Lars Roar Langslet. Aanderaa forfatta ei rad stortingsmeldingar som han sette i verk under ulike statsrådar. Han bygde det norske kulturhuset.

Dei fleste stortingsmeldingar er resultat av lange utgreiingar, komitéinnspel, høyringsrundar og lån frå Sverige. Aanderaa dikta sine sjøl og fekk dei politisk klarert av Bjartmar Gjerde. Han lente seg sterkt på landsgymnas-tradisjonen og trakk vekslar på samfunnsmessig nyorientering i mange land på begynnelsen av 70-talet, men han omforma tankegodset til operabel politikk.

Det er få stortingsmeldingar som har klare resultat, og endå færre som blir hugsa. Aanderaas stortingsmeldingar om kulturpolitikken set også i dag premissar og er direkte og indirekte referansegrunnlag for nye tiltak, skriv den kulturpolitiske kjentmannen Georg Arnestad. Fortsatt kan Aanderaas meldingar gje kultursjefar og andre apologetar klump i halsen.