MEST NORSK? Han er fransk kaviar-sosialist og hon er frå Bergen. Foto: NTB Scanpix
MEST NORSK? Han er fransk kaviar-sosialist og hon er frå Bergen. Foto: NTB ScanpixVis mer

Lausdrift og faste båsar

Uavgjort 0-0 mellom Solberg og Støre.

Kommentar

DENNE VEKA bytta dei små tullepartia mannskap i budsjettkrigen mot Segway-regjeringas gamle idear og dårlige løysingar. Bittelilletun og Grande overtok for å betra balansen og gjenskapa den gode stemninga frå Nydalen. Kristelig Folkepartis Hans Olav Syversen klaga over at Siv Jensen har bretta opp sureleppa og innført eit prinsipp som han ikkje kjenner frå bedehusbasarane: At budsjettgevinstar frå forhandlingane i fjor måtte leverast inn igjen og bli lodda ut på nytt. Slik er det ikkje når lystene tennes hos medlemmene i Norsk Luthersk Misjonssamband, dei såkalla sambandittane.

ERNA SOLBERG hissar til kamp mot Jonas Gahr Støre om kven som er mest norsk. Det må jo enda uavgjort 0-0. Han er fransk kaviar-sosialist og hon er frå Bergen.
Men det er ikkje rart at Erna Solberg blir stadig meir trumpen, for Jøtul-arvingen har stole hennar resept for framgang på meiningsmålingane: Sitta så stille som mulig i båten og mumla på fortellingen om Norge. Mens han tilpassar seg skiftande skatteregime, betaler sin formueskatt med lån og er mot reglar som ville gjera han endå rikare. Han er mot blokktenking i hodet og seier at dersom han kom til eit parti der alle var lik han, ville han gått ein annan stad. Det var vel slik han glapp for Høgre. Støre vil ha oss til å tru at Arbeiderpartiet er eit åpent forum for debatt og dialog. Den mannen har gått glipp av partiets tradisjon for demokratisk sentralisme.

Q-MINISTER Sylvi Listhaug har ansvar for å avskaffa båsar og innføra lausdrift i norske fjøs. Det kan bli redninga for Fremskrittspartiets faste, lause kanon på dekk, Per Sandberg, han som måler politisk avstand til samarbeidsparti i lysår. Alternativet til å bruka han som joker i politisk poker, er å bevara han som fortidsminnesmerke og visa han fram saman med ein relikvie frå John Alvheim og Carl I. Hagen som voksfigur i Oslo rådhus. Mot betaling.
Nå kan den gamle partieigaren angra på at han dagdrøymde så sterkt om å bli Stortingspresident og medlem av Nobelkomiteen at han let vera å plukka den lågt hengande frukta som Fylkesmann i Oslo og Akershus etter Kåre Willoch. Då hadde han hatt noe å sysla med. Bare synd at Stortinget forkasta tittelen «jarl» då amtmannen blei omdøypt i 1919.

NORGE BLIR i Afghanistan. «Vi får anerkjennelse for det vi bidrar med», skryter krigsminister Ine Marie Eriksen Søreide. Snart når vi vel også i den resolutte støttemisjonen eit sentralt mål i norsk utanrikspolitikk: Å bli formann i giverlandsgruppen.

VÅRE GUTTER og jenter skal også ut i krigen mot IS i Irak og Syria, men ikkje for å drepa terroristar i dei la'ene, som det heiter på Erna Solbergensk.  Dei skal bare hjelpa dei innfødde med å bli betre til å drepa. Av omsyn til soldatanes bluferdighet er det eit vilkår at dei slepp å bada nakne.       

Lik Dagbladet Meninger på Facebook