SV-SYKIST: Korfor ikkje ta den heilt ut og lova medvind på alle sykkelstiar, Heikki Holmås? Foto: Heiko Junge / NTB Scanpix
SV-SYKIST: Korfor ikkje ta den heilt ut og lova medvind på alle sykkelstiar, Heikki Holmås? Foto: Heiko Junge / NTB ScanpixVis mer

Lidende ledere

Forsvarsministeren ville protestera mot framande ubåtar med flaskepost.

Kommentar

DENNE VEKA har svenskane leita etter ein framand ubåt i Stockholms skärgård. Utan hell eller whisky on the rocks. Det er för jäkligt. Russarane er sjølsagt under mistanke, men det er farlig å selja skinnet før bjørnen er skoten. Den udødelige replikken om denslags er av veterinær Johan Kleppe (V) frå Bjørnskinn, som var forsvarsminister i Lars Korvalds post-nei-til-EF-regjering (1972-73). Då blei det jakta med skarpt på ein ubåt ved slagstaden Fimreite i Sognefjorden. Ingenting blei funne - verken ubåtar, kvalar eller makrellstimar. På pågåande spørsmål om korfor han ikkje hadde sendt ei skarp protestnote mot denne grove krenkinga av norsk territorialfarvatn, svarte statsråd Kleppe: «Kor skull' vi send den? Skull' vi bruk flaskpost?»

DEN BLÅ-BLÅ regjeringas sjølerklærte førstelskar, den grøne Trine Skei Grande, er i eit politisk arrangert fornuftsekteskap, men har late som om det var basert på tillit og kjærleik. Nå tvilar ho på truskapen i samlivet, for klimaet er dårlig. Avtalen og hopehavet frå Nydalen er blitt meir av ei ramme om kjøp og sal av saker, budsjettpostar og tenester. Slikt plar elles heita prostitusjon. Men så har då også Venstre stått saman med regjeringa for å oppheva sexkjøp-lova.

EIT GODT, MEN UBEKREFTA rykte vil ha det til at kulturbusinessminister Villvey skal ta eit kurs i selvutvikling med ein spirituell dimensjon på Märthas prinsesse- og engleskole. Thorhild Widvey kunne også ha nytte av ein seanse der dei snakkar med dei døde, ettersom ho går inn for aktiv dødshjelp. Ingen er som kjent friare og meir uavhengige og så reine og ranke som avdøde, meiningsberande aviser som har gått gjennom skjærselden.

I STATSBUDSJETTET demonstrerer Siv Jensen at den blå-blå arbeidslinja er rettferdig og konsekvent. Alle uføre skal straffast på pungen fordi det kan vera noen arbeidssky slabbedaskar mellom dei. Alle sterkt formuande skal belønnast fordi det kan vera noen mellom dei som kunne koma til å investera skatteletten i arbeidsplassar.

SV SLIT SÅ TUNGT at Heikki Eidsvoll Holmås vil ha skattelette for syklistar som høyrer til partiets grunnfjell. Korfor ikkje ta den heilt ut og lova medvind på alle sykkelstiar? Det løftet førte den politiske lausgjengaren Jacob Haugaard (Bevegelsen for Bevisst Arbeidssky Elementer) inn i Folketinget i Danmark.

MIN KAMP er tøff materie. Etter ei samla vurdering tapte Harald Eia den dramatiske kampen med å kutta Karl Ove Knausgård ned til teatralske dimensjonar. Men Funkenhauseren held nok fram den biologiske kampen for å fullføra fadermordet på sin akademiske bakgrunn som sosiolog, som han for øvrig krona med avhandlinga Lidende ledere og kompetente kalkulatører.

Lik Dagbladet Meninger på Facebook