BIOGEN: Det norske kontoret til legemiddelfirmaet Biogen, som produserer blant annet legemiddelet Spinraza til behandling av sykdommen spinal muskelatrofi (SMA).
Foto: Terje Bendiksby / NTB scanpix
BIOGEN: Det norske kontoret til legemiddelfirmaet Biogen, som produserer blant annet legemiddelet Spinraza til behandling av sykdommen spinal muskelatrofi (SMA). Foto: Terje Bendiksby / NTB scanpixVis mer

Legemiddelindustrien:

Milliardprofitt på menneskehelse

Den rabatterte prisen på Spinraza er bare eit plaster på såret.

Meninger

Forrige veke beslutta Beslutningsforum for nye metoder at born under 18 år skal få medisinen Spinraza mot muskelsjukdommen spinal muskelatrofi. Dette etter ei lang forhandlingsperiode på omlag eit halvt år.

Seier? Ja, for mange, men på ingen måte for alle. Plasterpolitikk? Ja, på mange måtar. Saka om Spinraza og SMA-borna er eit tydelig eksempel på kor urettferdig legemiddelindustrien er, der heile målet er profitt framfor liv og helse.

Forhandlingar med kvart enkelt selskap er ikkje ei bærekraftig løysing, når industrien er lagt opp slik at det einaste insentivet for forskning er profitt.

Høgre-politikar Sveinung Stensland seier vi må vere tøffe i innkjøpa våre slik at flest mogleg får tilgang til den medisinen dei treng. Vi seier; lat oss vere tøffe ovanfor industrien som legg til rette for milliardprofitt på menneskehelse.

SMA-saka er eit tydelig eksempel på kor urettferdig denne industrien er. I dag kan ein patentere medikament og få monopol på marknaden, slik at legemiddelselskapa møter lite eller ingen konkurranse på salet. Resultatet blir at dei sjølv kan bestemme prisen for produktet.

Denne prisen er som regel satt etter forventninga om kva marknaden er villig til å betale. Kva pris er rike velferdsnasjonar eller menneske med høg kjøpekraft villig til å betale for liv og helse? Ofte ein god sum. Dette set også prisen for liv og helse hos alle dei andre, med mindre eller inga kjøpekraft.

Verda over fins det fleire born med SMA, og dersom staten deira har lav kjøpekraft eller manglande ressursar til å ta Biogen til forhandlingsbordet forblir Spinraza ein uetisk dyr medisin.

Noreg seier seg ferdige og fornøgde med forhandlingane med Biogen. Men kva skjer neste gong nokon har behov for ein dyr medisin staten ikkje kan betale for? Changemaker meiner det er på høg tid å sjå på strukturen og politikken som gir legemiddelselskapa så utruleg mykje makt.

Den rabatterte prisen på Spinraza er eit plaster på såret for ein utdatert og urettferdig politikk; patentsystemet legg til rette for at legemiddelselskap kan tjene enorme summar på andres lidelse.

Det er klart at det er behov for insentiv for medisinsk forskning, verda er avhengig av at nokon driv med dette som både er kostbart og tidskrevande. Men det er ikkje riktig at insentivet skal kome frå lommebøkene til sjuke, allereie ressurssvake menneske.

Det er på tide at verdsamfunnet arbeider saman for ei endring i industrien der ein set rett til helse over profitt, og det byrjar med Norge.

Lik Dagbladet Meninger på Facebook