DENNE VEKA har Fremskrittspartiet toppa Asylvi Listhaugs elitelag med frelsarar som Aina Stenersen, Jan Arild Ellingsen og Odins soldat Ronny Alte. Anstendige høgrefolk toar sine hender og sukkar: Gjev oss Per Sandberg fri! (Luk 23,18)

Den alvorlige og strengt kontrollerande konstitusjonelle lov- og språkrøktaren Martin Arvid Kolberg (67) kom ikkje inn på realskulen fordi han var for dårlig i norsk. I eit intervju i bladet Vi over 60 insisterer han på å vera «en lystig sjel, tolerant og innimellom morsom». Det er bekrefta av den stadig kaldare krigaren Jens Soltenberg: «Når vi i Arbeiderpartiet går tom for underholdning, setter vi på «Nytt på nytt»-klippet med Martin Kolberg og Arne Strand, og så har vi det gående».

KOLBERG RYDDAR også opp i det betente forholdet til barndomsvennen til Thorbjørn Jagland. Dei var saman så å seia daglig i 25 år, men då Jagland overtok som statsminister, forviste han Kolberg til Forsvarsdepartementet. Etter det har dei hatt lite med kvarandre å gjera, så forholdet er ryddig og greitt. Men då Geir Lundestad kritiserte Jaglands noble manøvrar og engelsken hans, såg Kolberg det som mobbing -- «og da forvarer jeg'n: Thorbjørn og jeg er fra samme kultur. Når snobben begynner på den måten der, da kommer refleksen».