Kabal: Aldri har «regjeringskabal» til dei grader levd opp til namnet som no, skriv spaltist Jarl Wåge. Foto: Heiko Junge / NTB scanpix
Kabal: Aldri har «regjeringskabal» til dei grader levd opp til namnet som no, skriv spaltist Jarl Wåge. Foto: Heiko Junge / NTB scanpixVis mer

Solberg-regjeringen

«Nytt på nytt» kan ta seg nokre veker pause

Danning av ny firlingregjering byr på underhaldning frå øverste hylle.

Meninger

Når verkelegheita overgår den politiske satiren, er det nesten så «Nytt på nytt» kan ta seg nokre veker pause. Danning av ny firlingregjering har i alle fall bydd på underhaldning frå øverste hylle.

Spaltist

Jarl Wåge

er debattant, skribent og tidligere vinner av forteller-konkurransen «Storyslam». Foto: Sunniva Halvorsen

Siste publiserte innlegg

Aldri har «regjeringskabal» til dei grader levd opp til namnet som no. Og Erna Solberg har vist seg å vere ein slu kaballeggjar. Kvar gong ho gjekk tom for kort og såg at kabalen ikkje kom til å gå opp, laga ho like godt nokre ekstra og konstruerte nye statsrådar. Den mest originale er digitaliseringsminister Nikolai Astrup frå Høgre.

Allereie då den fyrste lekkasjen kom frå regjeringsdanninga, hausta Solberg imidlertid rabalder. Kjell Ingolf-dreg-du-den-så-dreg-du-den-Ropstad skulle bli familie- og likestillingsminister. Etter at Sylvi Listhaug måtte trekkje seg som justisminister, har det vore merkelg fredeleg frå den kanten. No har vi fått ein minister med tilsvarande evne til å provosere og skape sinne.

Ja, det er i sanning Listhaugske dimensjonar over Ropstad sin: «Kan ei kvinne bêre fram eitt barn, kan ho også bêre fram to». Hans tidlegare utsagn frå 2011 om at det er betre at kvinner bêr fram barnet og adopterer det bort enn at dei tar abort, pirrar og temperamentsløkane.

Denne mannen, som på ei lita kveldsstund klarte å hisse på seg massevis av norske kvinner, skulle altså, i fylgje rykta, bli deira minister. Som om ikkje det var nok; homominister i tillegg. Han som meiner at homofile ikkje ein gong er verdige til å få gifte seg.

Men sjå om ikkje Solberg hadde enda eit kort i ermet. Likestilling og homosaker skulle plutseleg bli kultur og vere Trine Skei Grande sitt domene. Dette var truleg eit lurt trekk, for støy frå kvinne- og homoaktivistar kan bli i meste laget. Ropstad har visst ei sart sjel i ein sart lekam. I alle fall har den eine etter den andre skulda venstresida for å utsette stakkaren for hat, mobbing og sjikane. Eller kritikk, satire og temperatur som det òg heiter.

Men no klarte ikkje Solberg heilt å frita familieministeren frå homofile. Det har seg slik at desse også får barn og lever saman i familiar. Sjølv om han ser på familiar med ein far og ei mor som det ideelle, lovde han i samtale med Fredrik Solvang på tv at han «au vil være minister for desse familiane». Knut Arild Hareide, som på forbilledleg vende-andre-kinnet-til-vis forsvarer Ropstad som eit raust menneskje, er òg viss på at han kjem til å jobbe for alle barn.

Medan Siv Jensen framleis dreiv ørkeslaus ørkenvandring i opposisjon, kom ho med nokre udødelege lovnader som for alltid står skrivne i stein. Om ho kom til makta, skulle følgjande skje:

«Krekar ut av landet i ein fei. Null kroner i bompengar. Kraftig avbyråkratisering.» Alle veit korleis det har gått. Noregshistorias mest talrike regjering vil heller ikkje bidra til å minske eit stadig veksande byråkrati.

Likevel meiner mange at Frp har kome ut av regjeringsforhandlingane som dei største vinnarane. Dei kan i alle fall le heile vegen til kongens bord, for sjølv om Kristeleg Folkeparti har fått tre ministrar, har Frp framleis sju. Likevel bør Siv Jensen prise seg lukkeleg over at Solberg i sitt kreative hjørne ikkje kom opp med enda ein ministerkonstruksjon som gåve til Frp; ein avbyråkratiseringsminister til dømes.

For det kan sjå ut som om Frp manglar folk å ta av. I alle fall får dei regjeringa til å sjå ut som ei dynastisk familieverksemd. Kona til Christian Tybring-Gjedde blir nykonstruert samfunnssikkerheitsminister, og mannen til Sylvi Listhaug blir statssekretær.

Om dette er så lurt, vil tida vise. Det fungerte ikkje for Miriam Sandberg og mannen, Per. Ho gjekk av som statssekretær, og han som fiskeriminister etter at han oppdaga grønare gras på andre sida av regjeringsgjerdet.

«Du kan ta dama ut av Trøndelag, men aldri Trøndelag ut av dama,» er eit godt gammalt stammeord. Ein stamme som Trøndelag Høgre tydelegvis ikkje er ein del av. Dei gjorde opprør mot sjølvaste Erna då dei skjønte at Linda Hofstad Helleland ikkje lenger fekk spele på regjeringslaget. «Ikkje ein einaste trønder,» var deira fornærma omkvede i eit forsøk på å ta Trøndelag ut av Skei Grande.

«Hvem teller vel de tapte slag på seierens dag», skreiv Bjørnstjerne Bjørnson. Då firlingane skulle presentere regjeringsplattformen, var det viktig for kvar enkelt å stå fram som vinnarar. Kanskje aller mest for dei to minste som opplever heftig innbyrdes strid om regjeringsdeltaking. For Venstre var klima og innvandring greiner der dei meinte dei fortente gull og laurbær.

Men Venstre hadde visst gløymt å lese det som står med lita skrift. Dei har fått gjennomslag for å ta inn 3000 kvoteflyktningar. Som før. Det dei ikkje har fått med seg, er at 3000 er maksimum. Så om vi tar imot asylsøkjarar i tillegg, blir det tilsvarande færre kvoteflyktningar. Dermed kan Noreg komme til å ta imot færre enn før. Og det med KrF og Venstre i regjering. Dermed kan Frp vise fingeren til partiet som raust har halde dei i regjering i fem år.

I Venstre har det forresten vore misnøye med statsrådstaburettane partiet har fått tildelt. Særleg Skei Grande, har dei meint, burde få eit tyngre og meir synleg departement. Det er kanskje difor ho hadde ytra ønskje om å få likestilling lagt til kultur.

Medan firlingregjeringa no skal byrje å virke, bør kanskje «Nytt på nytt»-gjengen overføre litt av lønna si til dei som ei takk for denne Sareptas krukke dei kan ause idear av til framtidige program.

Lik Dagbladet Meninger på Facebook

Meninger rett i innboksen?

Meld deg på vårt nyhetsbrev for å motta ukens viktigste saker fra Dagbladet Meninger hver fredag. Nyhetsbrevet kan inneholde annonser. Du kan når som helst melde deg av.