Pablo Neruda! For oss som har lese poesi ei stund er det ei eiga kraft i dette namnet. Dette er mannen bak eit av dei poetiske hovudverka i førre hundreåret, «Canto General», eller «Den store sangen», som boka heiter på norsk i Halvor Roll si framifrå gjendikting.

Men heldigvis kan eg visa den interesserte lesaren til fleire særs gode gjendiktingar. I tillegg til Roll, er det først og fremst Kjartan Fløgstad som har omsett dikt.

Desse finn du i «Pablo Neruda. Dikt i utval» (Lyrikklubben, 1973), og i «Dikt og spelemannsmusikk», (Gyldendal, 1993), samt i den nyleg utkomne «Kapteinens vers» 2003, (Solum). Elles har Kjell Risvik omsett sjølvbiografien til Neruda, «Jeg tilstår at jeg har levet» (Gyldendal i 1974). Til «Den store sangen» har Terje Johanssen skrive eit leseverdig etterord.

Eigentleg heitte han Ricardo Eliecer Neftalí Reyes, og vart fødd i Parral i Chile den 12 juni 1904. Til neste år er det altså eit hundreårsjubileum. Han fekk prenta det første diktet sitt alt som trettenåring. Då han var tjue tok han til å bruka forfattarnamnet Pablo Neruda. Pablo tydar på hebraisk «han som seier vakre ting», og Neruda hadde han plukka opp frå den tsjekkoslovakiske poeten Jan Neruda.