På NRK Sundagsrevyen 18. september var det ein reportasje om at over 29.000 personar under 30 år går på arbeidsavklåringspengar (AAP). NHO vil at desse skal missa denne ytinga. Som kritikklaus lakei for NHO sin kyniske agenda, har Sundagsrevyen med eit brukaralibi i innslaget som viser kor godt det er å koma i jobb framfor å motta AAP, men ingen kritikarar til NHO sitt framlegg vart intervjua.

75 prosent av alle psykiske lidingar debuterer før fylte 25 år. Difor er det absurd å setja ei nedre grense på 30 år for å få AAP eller uføretrygd, slik vondsinna NHO-folk og Frp-arar vil. Men dette gjer altså NRK seg til talerøyr for.

Og på Dagsrevyen si side for strøyming på nrk.no har dei titulert innslaget som «8. Utenforskap og AAP». Og nettopp ordet «utenforskap» nyttar også administrerande direktør i NHO, Kristin Skogen Lund, i same innslag. NRK har altså kjøpt denne sterkt politisk farga nemninga som høgresida nyttar for å sverta velferdsordningane våre.

Kristin Skogen Lund påstår òg kategorisk at «mange [av dei under 30 år på AAP ikke] i utgangspunktet [er] syke. Det er et mestringsproblem som gjør at de står utenfor … ».