Når regjeringa no har foreslått ei utgreiing av fag- og timefordelinga er det særleg for å gjere elevane betre førebudde på vidare studiar. Det stemmer altså ikkje, som Torbjørn Ryssevik og Anders Folkestad skriv i Dagbladet torsdag, at regjeringa ønsker å løyse problemet med fråfall med å fjerne fellesfaga.

Den største utfordringa med dagens vidaregåande skule er at for mange fell ifrå. Det får store konsekvensar for den enkelte. Regjeringa si fullføringsreform inneheld ei heil rekke tiltak for å minske nettopp fråfallet frå vidaregåande.

Reforma skal også svare på andre utfordringar ved dagens vidaregåande opplæring. 3 av 5 studentar seier at dei ikkje blir godt nok førebudde på dei akademiske krava som blir stilt i høgare utdanning. Meldingar frå universitet og høgskuler seier det same – elevane har ikkje fått nok trening i å lese og analysere lengre tekstar, skrive akademisk og arbeide sjølvstendig.

Når regjeringa no har foreslått ei utgreiing av fag- og timefordelinga, så er det særleg for å gjere elevane betre førebudde på vidare studiar. Det er ingen grunn til å endre noko som fungerer, men er vi verkeleg så sikre på at dagens fag- og timefordeling fungerer godt nok?